كسكسو من إيديا لكلشي كيحماق عليه واسرار البنة ديالو تفضلو مرحبا

اشخباركم بنات اللمة المغربية نتمنى تكونو بألف خير وعيدكم مبارك سعيد

اليوم وجدت هده القصيرية الكسكسو لهي دكالية وبغيت نشاركم طريقتي لكتخلي كل من ذاقو يعطي به المتال وحتى سر البنة ديالو نتمنى يعجبكم



المقادير
كيلو لروب لحم البقر
كيلو لروب سميدة الكسكس
كيلو لروب مطيشة
نصف كيلو بصلة
4 خيزوات
2 حبات كرعة خضرا
نصف كيلو كرعة حمرا
واحد طرف سلاوي كان عندي
شوية قزبر
فلفلة حارة
شوية سمن
ملح ابزار سكنجير وخرقوم بلدي واصطناعي
واحد طرف سلاوي كان عندي
ربع كاس زيت

الطريقة
اول حاجة كنقلي اللحم مع زيت وخرقوم وملح كنخليه يتشحر مزيآآآان قد ماتقلى قد ما كيجي بنينوهدا اول سر البنة


من بعد كنضيف البصلة مقطعة على طول ونخليها تتشحر حتى هي مزيان

حتى تدبل

من بعد كنضيف مطيشة منقية ومقطعة وقبيطة قزبر


ونخليها تتقلى حتى هي حتى تدوب وتولي خاترة وقد ماكانت كثيرة قد ما جا كسكسو بنين عاد كنضيف العطرية وشوية سمن نحرك شوية


تم كنضيف الماء1 ل ونغلق ونخلي اللحم يطيب شوية ربع ساعة عاد كنضيف الخضرة لكتبغي طياب كتر خيزو سلاوي حيث هما لكانو عندي

وكنبدا نكسكس في سميدة طبعا طريقة معروفة


اهم حاجة ان في كل فورة لازم نخليوها تفور مزيان حيت قد مافارت قد ماكتشرب الماء وكتجي منفوخة ورطبة ومانديروش ليها زيت حتى لفورة الآخيرةونسقيوها سخونة بلى مانبردوها وبلى مانخفو من الماء باش ماتجيش عاصية والماء معزول عليها

كنفورو الآولى والتاني

وكنرميو القرعة حمرا وخضرا وفلفلة حارة ونخليها حتى يدخلها طياب عاد نرميو الفورة الآخيرة بعد مادهنها بزيت العود وقبل مانرميها كندوقو الى ناقصة شي حاجة من لعطرية كنزيدوها

هده فورة الآخيرة خاصها تطلع في الفوار مزيآآآآان
كنفرغوها في قصرية كين لكيبغي ينسمها بالسمن انا كنديرو غير في الآول لآنه عندي سمن حار (حيل)
كنقادها واهم حاجة مخصهاش تبردوها بزاف باش تشرب لاصوص
كنسقي جناب هما الآولين ونحط في الوسط البركة ديال لحيمات

ونبدا نستف في خضرة عاد نسقي منالفوق وها كسكسويا واجد


بالصحة والعافية