نصائح تفيدك في .....................عيد الأضحى

بسم الله الرحمان الرحيم
نصائح تفيدك في .....................عيد الأضحى
عيدكم مبروك الله يدخلوا عليكم بالصحة و السلامة و طول لعمر و المغفرة إن شاء الله و باش ما تمنيتم

1- نبداو على بركة الله بالخروف بما ان يوم العيد ان شاء الله الاثنين فنصيحتي لكي اختي بعد عصر يوم الاحد يمنع من الطعام و يقدم له فقط الماء لكي تسهل عملية سلخه و ايضا تسهل عملية غسل الكرشة و المصارين (تكون خالية من الترث)
2- بعد ذبح الأضحية يجب غسل الراس بالماء جيدا عن الدم العالق به و هو لازال اخضر و ترك ينشف جيدا ثم بعد ذلك يشوط اما على الفحم او البوطا صغيرة او يصلق و يسلخ عنه جلد الراس
3- في حالة شوطنا الراس يجب غسله جيدا و ذلك باستعمال جيكس باش كنغسلو الاواني و حكي مزيان حتى تحيد لكحولة و طبخيه في الماء و ورقة موس حتى يحيدو كشكش منو يخرج منو كاع داك شواط
4- بالنسبة للجلد الا انت بغيت تصوبي منو هيدورة (ليوش) غسليه مزيان بالماء و التيد حتى يصفى الماء فاش كتغسليه و من بعد قلبه بمعنى الصوف الداخل و الجلد على الخارج و نشريه ينشف في الشمس نين ينشف دردري عليه الملح مزيان و خليه في الظل و فرشي ليه شي كرتون لحقاش غادي يخرج منو الماء نين ينشف مزيان و يبان ليك بحال الا بغا يبس و صفتيه للدباغ او تشدى قشور الرمان يابس و مطحون خلطيه بالماء و دهنيه كلو بيه و نين ينشف عاد صفتيه للدباغ هذه الطريقة كتخليه يصبر ليك اكثر لان الشبة الي كيستعمل الدباغ كتخليه راشي فيسع يتقطع و الا مابغيتيهش ملحيه مزيان باش ما يخسر و صدقيه او عطيه لصحاب الجلد
5- بعد غسل الكرشة و المصارين ديرهم يستقطرو مزززززززززيان عاد قطعيهم و عطريهم و عاودي ديرهم على حاشية ديال كسكاس بحال نشير حوايج هههههه حتى يستقطرو لان الملح كيخرج منو الماء و الا انت صايبتي العصبان (كرداس) بهذا الماء كيخمرو و كيخناز
6-الا بغيتي تحيدي زفرة ديال اللحم نين تبغي تفوريه ديري في ماء ديال التفوار بصلة مقطعة و ورقة موسى و كمون كيحيد الزفرة
7-لحم الراس شرمليه و خليه نهار كامل في شرمولة و ديريه يطيب بحال طايب طنجية في الكوكوت نار مهيلة و مدة طياب طويلة 2حتى 3 باش كيجي بحال زبود من الطياب كيجي غزال مشهيتكم فيه
8- الا كنتي ديرا مرقة ديري زعفران حر و عطرية و شرملي اللحم و خليه يتشحر مزيان حتى يبدا يدخل ليه الطياب و ضيفي البصلة فوق اللحم و لللللكن متحركيش البصلة خليها فوق اللحم حتى تذبل (فوق نار مهيلة) عاد حركي بملعقة خشبية
9-الا بغيتي لحم مشوي في كوكوت شدي اللحم و ملح و كتري كمون و قليل من زيت و قليل من الماء و سدي كوكوت غير تبدا تدور الصفارة نقصي البوطة و مرة مرة حركي الكوكوت حتى يطيب و يتحمر و الا فتحتي عليه قبل ما يتحمر عاودي سدي عليه ماكاين باس
و الله يدخل هذا العيد عليكم بالصحة و السلامة قديما قالوا

جمال الروح يهون عليك المصائب

جمال النفس يسهل لك المطالب

جمال العقل يحقق لك المكاسب

جمال الشكل يسبب لك المتاعب


أَفْضَلُ النَّاسِ مَنْ تَواضَعَ عَنْ رِفْعَةٍ، وعَفا عَنْ قُدرةٍ، وأَنْصَفَ عن قُوةٍ‏

merci a hbiba tbarkelah 3lik hadga lahyehfdek

شكرا أختي فارها علي رسالتك وبارك الله فيك